پاکستان بیت المال نے بلوچستان انیشی ایٹو کے تحت بھرتیوں کے لیے سلیکشن کمیٹیاں تشکیل دے دیں

اسلام آباد: پاکستان بیت المال نے وزیراعظم پاکستان کے وژن اور ہدایات کی روشنی میں بلوچستان میں اپن فلاحی منصوبوں کو مزید مستحکم بنانے کے لیے مختلف انتظامی اور پاکستان بیت المال کی پراجیکٹ آسامیوں پر بھرتیوں کے سلسلے میں اہم پیش رفت کرتے ہوئے تمام ضروری ابتدائی انتظامات مکمل کر لیے ہیں۔

اس سلسلے میں محکمانہ سلیکشن بورڈز/کمیٹیوں کی باضابطہ تشکیل عمل میں لائی گئی ہے، جبکہ بھرتیوں کے لیے مقررہ معیار اور اشتہاری عمل بھی مکمل کیا جا چکا ہے۔

ان بھرتیوں میں انتظامی نوعیت کی آسامیوں، جن میں اسسٹنٹ پرائیویٹ سیکرٹری، آفس اسسٹنٹ، جونیئر کلرک، ڈسپیچ رائیڈر، اکاؤنٹس/آڈٹ اسسٹنٹ، ہارڈویئر انجینئر اور ڈیٹا انٹری آپریٹر شامل ہیں، کے علاوہ چائلڈ لیبر کے خاتمے کے لیے قائم اسکولز (SRCLs) اور ویمن ایمپاورمنٹ سینٹرز (WECs) کی منصوبہ جاتی آسامیوں، جن میں پراجیکٹ انچارج، ٹیچر انچارج، فیلڈ اسسٹنٹ، انسٹرکٹر، ٹیچر، اکاؤنٹس اسسٹنٹ اور کمپیوٹر انسٹرکٹر شامل ہیں، پر بھی بھرتیاں کی جائیں گی۔

ان آسامیوں پر موزوں امیدواروں کے انتخاب کا عمل مقررہ قواعد و ضوابط اور معیار کے مطابق جلد شروع کیا جائے گا۔

منیجنگ ڈائریکٹر پاکستان بیت المال، سینیٹر کیپٹن شاہین خالد بٹ نے اس عزم کا اظہار کیا ہے کہ بھرتیوں کا تمام عمل شفافیت، میرٹ اور مساوی مواقع کے اصولوں کے تحت مکمل کیا جائے گا تاکہ اہل اور قابل امیدواروں کا انتخاب یقینی بنایا جا سکے۔

پاکستان بیت المال کے شعبہ ہیومن ریسورسز نے بھرتیوں کے عمل کو مؤثر، منظم اور شفاف انداز میں آگے بڑھانے کے لیے تمام ضروری انتظامی اور دفتری اقدامات مکمل کر لیے ہیں۔

یہ اقدام بلوچستان میں وزیراعظم پاکستان کے وژن کو عملی شکل دینے، روزگار کے مواقع پیدا کرنے، ادارہ جاتی استعداد کار بڑھانے اور عوام کو بہتر فلاحی خدمات کی فراہمی کے لیے پاکستان بیت المال کے عزم کا مظہر ہے