وزارت صنعت و پیداوار کے تحت انجینئرنگ ڈویلپمنٹ بورڈ (ای ڈی بی) اور نیشنل یونیورسٹی آف سائنسز اینڈ ٹیکنالوجی (نسٹ) کے اشتراک سے “انڈسٹری 4.0 اور انجینئرنگ انڈسٹری کے لیے پراسیس آٹومیشن” کے موضوع پر سیمینار کا انعقاد کیا گیا۔ یہ سیمینار نسٹ کیمپس ایچ-12، اسلام آباد میں منعقد ہوا جس میں حکومتی عہدیداروں، صنعتی ماہرین، پالیسی سازوں اور تعلیمی اداروں کے نمائندوں نے شرکت کی۔ سیمینار کا مقصد پاکستان کی صنعتی ترقی میں ڈیجیٹلائزیشن اور آٹومیشن کے فروغ پر تبادلہ خیال کرنا تھا۔
سیمینار میں انڈسٹری 4.0 ٹیکنالوجیز، بشمول آئی او ٹی، مصنوعی ذہانت، روبوٹکس، بگ ڈیٹا اینالیٹکس اور سائبر-فزیکل سسٹمز کو اپنانے کی اہمیت پر زور دیا گیا تاکہ صنعتی کارکردگی اور عالمی مسابقت کو بہتر بنایا جا سکے۔
نسٹ کے پرو ریکٹر (آر آئی سی) نے تحقیقی و تخلیقی ماحول کو فروغ دینے میں تعلیمی اداروں کے کردار کو اجاگر کیا۔ وفاقی وزیر صنعت و پیداوار رانا تنویر حسین نے سیمینار کا افتتاح کرتے ہوئے صنعتی ترقی کے لیے آٹومیشن اور اسمارٹ مینوفیکچرنگ کی ضرورت پر زور دیا۔
ای ڈی بی کے چیف ایگزیکٹو آفیسر نے انڈسٹری 4.0 کو مسابقتی برتری کے لیے اہم قرار دیتے ہوئے ڈیجیٹل ٹرانسفارمیشن کی حکمت عملی اپنانے کی ضرورت پر زور دیا۔ حکومتی، تعلیمی اور صنعتی ماہرین نے پالیسی فریم ورک اور ڈیجیٹل اپنانے کی حکمت عملیوں پر تبادلہ خیال کیا۔ ای ڈی بی نے انجینئرنگ سیکٹر میں صنعت اور ٹیکنالوجی کے درمیان فاصلے کو کم کرنے کے عزم کا اعادہ کیا۔
وفاقی وزیر برائے منصوبہ بندی، ترقیات اور خصوصی اقدامات احسن اقبال نے سیمینار کے اختتام پر اکیڈمیہ اور صنعت کے اشتراک کی اہمیت پر روشنی ڈالی
ای ڈی بی کے سی ای او انجینئر خدا بخش نے شرکاء کا شکریہ ادا کیا۔ اس موقع پر شرکاء نے نیشنل سائنس اینڈ ٹیکنالوجی پارک (این ایس ٹی پی) کا دورہ بھی کیا جہاں جاری تحقیقی و تخلیقی منصوبوں کے حوالے سے معلومات فراہم کی گئیں۔
ای ڈی بی کے سی ای او نے اعلان کیا کہ ایسے سیمینارز ملک کے بڑے صنعتی مراکز میں بھی منعقد کیے جائیں گے تاکہ صنعت کو تعلیمی اداروں سے مزید قریب لایا جا سکے۔
اسلام آباد، 11 فروری 2025
