‏گلبرگ گرین ‏اسلام آباد میں فراڈ ، پراپرٹی ڈیلر سعد محمد گرفتار، متعدد متاثرین سامنے آنے کا دعویٰ

‏اسلام آباد: وفاقی دارالحکومت کے علاقے گلبرگ گرین سے تعلق رکھنے والے پراپرٹی ڈیلر سعد محمد ولد دوست محمد کو مبینہ فراڈ، دھوکہ دہی اور دیگر الزامات کے تحت قانون نافذ کرنے والے اداروں نے گرفتار کر لیا ہے۔ ذرائع کے مطابق ملزم کے خلاف متعدد شکایات موصول ہونے کے بعد کارروائی عمل میں لائی گئی، جبکہ مزید متاثرین سے بھی رابطے کیے جا رہے ہیں۔

‏شکایت کنندگان کے مطابق ملزم مبینہ طور پر پراپرٹی کے کاروبار کی آڑ میں سرمایہ کاروں کا اعتماد حاصل کرتا تھا۔ ان کا کہنا ہے کہ ابتدا میں وہ 25 سے 50 لاکھ روپے تک کی سرمایہ کاری پر بروقت منافع اور اصل رقم واپس کر دیتا تھا، جس کے باعث سرمایہ کار اس پر مکمل اعتماد کرنے لگتے تھے۔

‏مدعیان کے مطابق جب اعتماد قائم ہو جاتا تو ملزم بڑی سرمایہ کاری کی پیشکش کرتا اور اپنے مبینہ فرنٹ مینوں کے ذریعے سرمایہ کاروں کو یقین دلایا جاتا کہ سرمایہ کاری مکمل طور پر محفوظ ہے اور انہیں مقررہ وقت پر بھاری منافع حاصل ہوگا۔ شکایت کے مطابق ادائیگی چیک کے ذریعے وصول کرنے کے بعد ملزم سرمایہ کار کو دفتر میں انتظار کرواتا اور یہ کہہ کر روانہ ہوتا کہ وہ بینک سے رقم نکلوا کر فوری واپس آ رہا ہے۔

‏متاثرین کا الزام ہے کہ کچھ دیر بعد ملزم بینک بند ہونے کا بہانہ بنا کر سرمایہ کار کو اگلے روز ادائیگی کی یقین دہانی کے ساتھ واپس بھیج دیتا، تاہم بعد ازاں نہ رقم واپس کی جاتی اور نہ ہی کیے گئے وعدے پورے کیے جاتے۔ ان کے مطابق یہی طریقہ کار اختیار کرتے ہوئے متعدد افراد کو مبینہ طور پر لاکھوں اور کروڑوں روپے کا نقصان پہنچایا گیا۔

‏ذرائع کا دعویٰ ہے کہ ملزم تقریباً تین سال سے مختلف مقدمات اور شکایات کے باعث قانون نافذ کرنے والے اداروں کو مطلوب تھا، تاہم حالیہ کارروائی میں اسے گرفتار کر لیا گیا۔ تفتیشی حکام اب اس بات کا بھی جائزہ لے رہے ہیں کہ آیا اس مبینہ فراڈ میں دیگر افراد یا سہولت کار بھی شامل تھے یا نہیں۔

‏قانون نافذ کرنے والے اداروں نے ایسے تمام افراد سے اپیل کی ہے جو سعد محمد کے ہاتھوں مبینہ دھوکہ دہی یا فراڈ کا شکار ہوئے ہیں کہ وہ متعلقہ شواہد، دستاویزات، بینک ریکارڈ اور دیگر ثبوتوں کے ساتھ تھانہ لوہی بھیر سے رابطہ کریں تاکہ ان کی شکایات بھی تفتیش کا حصہ بنائی جا سکیں اور قانونی کارروائی کو آگے بڑھایا جا سکے۔

‏واضح رہے کہ سعد محمد کے خلاف عائد تمام الزامات تفتیش اور عدالتی کارروائی کے مراحل میں ہیں۔ قانون کے مطابق کسی بھی ملزم کو عدالت سے جرم ثابت ہونے تک بے گناہ تصور کیا جاتا ہے، اور اس مقدمے کا حتمی فیصلہ بھی عدالت ہی کرے گی