دفاعی معاہدے کی تقریب کے انعقاد پر اے پی پی کی شاندار کاوش، ایم ڈی سبین عثمان خٹک کا عملے کو خراجِ تحسین

راولپنڈی، 9 اگست 2026: ایسوسی ایٹڈ پریس آف پاکستان (اے پی پی) کی منیجنگ ڈائریکٹر (انچارج) محترمہ سبین عثمان خٹک نے کہا ہے کہ پاکستان، سعودی عرب اور ترکیہ کے مابین طے پانے والے تاریخی دفاعی معاہدے کے تناظر میں حکومتِ پاکستان نے فیصلہ کیا تھا کہ اس اہم پیش رفت کی تقریب کو قومی وقار کے شایانِ شان انداز میں منعقد کیا جائے گا۔

محترمہ سبین عثمان خٹک نے بتایا کہ حکومتی ہدایات کی روشنی میں اے پی پی نے بطور قومی خبر رساں ادارہ اپنا کلیدی کردار ادا کیا۔ اس سلسلے میں اے پی پی کے شعبہ ایڈمن، سوشل میڈیا، فوٹو سیکشن اور الیکٹریشن سیکشن کے افسران و عملے نے انتہائی پیشہ ورانہ مہارت، محنت اور لگن کا مظاہرہ کرتے ہوئے تفویض کردہ تمام امور کو مقررہ وقت میں کامیابی سے مکمل کیا۔

ایم ڈی اے پی پی نے کہا کہ ادارے کی عمارت کی تزئین و آرائش، تقریب کی بروقت کوریج، ڈیجیٹل پلیٹ فارمز پر مؤثر تشہیر اور فوٹوگرافی کے شعبے میں ہماری ٹیموں کی کارکردگی کو سرکاری اور عوامی حلقوں میں بھرپور پذیرائی ملی۔ اس اجتماعی کاوش سے نہ صرف اے پی پی کے قومی تشخص کو نمایاں مقام حاصل ہوا بلکہ ادارے کے وقار میں بھی اضافہ ہوا جو ہم سب کے لیے باعثِ فخر و اطمینان ہے۔

انہوں نے تمام شعبہ جات کے عملے کی خدمات کو سراہتے ہوئے کہا کہ ٹیم ورک اور فرض شناسی کی یہ اعلیٰ مثال دیگر قومی اداروں کے لیے بھی مشعلِ راہ ہے۔

محترمہ سبین عثمان خٹک نے اس عزم کا اعادہ کیا کہ وہ اے پی پی کو جدید تقاضوں سے ہم آہنگ کرنے، ادارہ جاتی استعداد کار بڑھانے اور ملازمین کی پیشہ ورانہ ترقی و فلاح و بہبود کے لیے تمام دستیاب وسائل اور صلاحیتیں بروئے کار لائیں گی۔